Qaysi dasturlash tilini tanlash kerak?

Dasturlashni endi boshlayotganlarning eng ko‘p beradigan savollaridan biri bu: "Qaysi dasturlash tilini o‘rganishim kerak?" Ushbu blog orqali dasturlash tili tanlashda nimalarga e’tibor berish kerakligini ko‘rib chiqaman.

Maqsadingizni aniqlang

Avvalo dasturlash tilini tanlashdan oldin maqsadingizni aniqlab olish muhim. Masalan:

• Kimdir masalalar ishlash va algoritmlarni o‘rganish bilan shug‘ullanmoqchi.
• Kimdir dasturchilikni kasb sifatida rivojlantirishni rejalashtirgan.
• Kimdir esa sun’iy intellekt yoki mobil ilovalar yo‘nalishiga kirishni xohlaydi.

Kelgusi bo‘limlarda ushbu maqsadlarga mos dasturlash tillarini tahlil qilaman.

Algoritmlash va masalalar ishlash

Algoritmlarni o‘rganish dasturlashga kirish uchun muhim qadam hisoblanadi. Masalalar yechishda dastur:

• Tez ishlashi kerak.
• Kam xotira sarflashi lozim.
• Cheklangan vaqt va xotira limitlariga mos kelishi shart.

Tavsiya etilgan tillar:

• C++:
  • Samaradorlik va tezlik jihatidan yuqori o‘rinda turadi.
  • Ko‘plab sport dasturlash olimpiadalarida (masalan, IOI) keng qo‘llaniladi.
• Python:
  • Oddiy sintaksisi tufayli dasturlashni tez o‘rganish imkonini beradi.
  • Olimpiadalarda barcha masalalarni Python orqali ham yechish mumkin, lekin u ba’zi hollarda C++ ga nisbatan sekinroq ishlashi mumkin.

Xulosa: Agar siz faqat C++ ruxsat etiladigan olimpiadalarda qatnashishni rejalashtirgan bo‘lsangiz, C++ ni o‘rganish eng yaxshi tanlovdir. Aks holda, Python ham yaxshi tanlov.

Backend dasturlash

Backend dasturlashda samaradorlik va tezkorlik juda muhim.

• C++ orqali algoritmlashni yaxshi o‘zlashtirsangiz, Golang kabi yuqori samaradorlikka ega tillarni keyinchalik o‘rganish qiyinchilik tug‘dirmaydi.
• Python esa Django, Flask, FastAPI kabi boy kutubxonalari tufayli backendni tez o‘zlashtirish imkonini beradi. Ammo u C++ yoki Golang kabi tez emas.

Tavsiya: Agar qiyinchiliklardan qo‘rqmasangiz va yuqori samaradorlikni afzal ko‘rsangiz, C++ ni o‘rganing. Keyinchalik Golang yoki boshqa tillarni o‘zlashtirish unchalik katta muammo bo‘lmaydi.

Frontend dasturlash

Frontend dasturchilik foydalanuvchi interfeyslarini yaratish bilan bog‘liq. Asosan quyidagi tillar ishlatiladi:

• HTML, CSS va JavaScript: Frontend dasturlashning asosiy tillari.
• React yoki Vue.js: Interfeyslarni yaratish uchun mashhur JavaScript kutubxonalari.

Tavsiya: Avval osonroq dasturlash tilini o'rganib, keyin JSni o‘rganishni tavsiya qilaman. Masalan, Python orqali dasturlash asoslarini o‘rganib, keyin frontend va Python frameworklari yordamida Fullstack dasturchiga aylanishingiz mumkin.

Mobil dasturlash

Mobil ilovalarni ishlab chiqish uchun tanlovingiz quyidagicha bo‘lishi mumkin:

• Kotlin yoki Java: Android ilovalar yaratish uchun yaxshi tanlov.
• Swift: iOS ilovalari uchun mos tildir.
• Flutter (Dart): Android va iOS uchun bir kod asosida ilovalar yaratish imkonini beradi.

Flutter haqida qiziqarli faktlar:

1. Flutter Google tomonidan yaratilgan bo‘lib, dastlab 2017-yilda e’lon qilingan.
2. Flutter bir vaqtning o‘zida ikkita platformada (Android va iOS) ilova yaratishga imkon beradi.
3. Flutter-da ishlatiladigan Dart tili sintaksisi jihatidan oson va o‘rganish uchun qulay.
4. Hot Reload funksiyasi tufayli dasturchilar koddagi o‘zgarishlarni darhol ko‘rish imkoniyatiga ega.
5. Flutter UI komponentlari platformadan mustaqil bo‘lib, ular barcha qurilmalarda bir xil ko‘rinadi.
6. Flutter dasturchilari ish bozorida katta talabga ega va ularning soni yildan yilga oshmoqda.

Tavsiya: Mobil dasturlashga qiziqayotganlar uchun Dartni o‘rganishni tavsiya qilaman. Chunki Flutter yildan yilga rivojlanib bormoqda.

Sun’iy intellekt va mashinaviy o‘qitish

Sun’iy intellekt sohasida Python yetakchi tildir. Buning sabablari:

• TensorFlow, PyTorch, scikit-learn kabi mashhur kutubxonalarning mavjudligi.
• Ma’lumotlarni qayta ishlash va vizualizatsiya qilish uchun Pandas, NumPy, Matplotlib kabi vositalar.
• Oddiy sintaksis va keng jamoatchilik yordami.

Tavsiya: Bu sohada Pythondan yaxshiroq variant yo'q. Shu tufayli Pythonni o'rganishni boshlashingizni tavsiya qilaman.

Xulosa

Dasturlash tilini tanlashda asosiy omillar sizning maqsadingiz, qiziqishingiz va o‘rganish uslubingizdir. Yuqoridagi ma’lumotlar sizga to‘g‘ri qaror qabul qilishda yordam beradi deb umid qilaman.

Agar qandaydir savollaringiz bo'lsa komentariyalarda kutib qolaman.